الختم أبن ال.......... :: أدب ساخر

الختم أبن ال.......... :: أدب ساخر

الختم أبن ال..........

ذهبت بالأمس إلى الشهر العقاري لعمل توكيل للمحامي وقررت الذهاب مبكراً قبل الزحام وأنا أعشم نفسي بإنهاء
هذه المهمة بسرعة وفي التاسعة صباحاً كنت داخل الشهر العقاري ووجدت ثلاثة فقط واقفين أمام المدير وأنا رابعهم
وقلت في نفسي الموضوع كده سهل خالص مش هناخد نص ساعة ونخلص علطول .
طلبوا منا شراء طلب . ثم تقديمه للمدير ليقوم المدير بتحويله إلى أحد الموظفين في المكتب المجاور . ثم نذهب للموظف والذي يقوم بكتابة التوكيل . ثم نذهب إلى الخزنة للدفع . ثم نرجع مرة ثانية إلى الموظف يمضي على الطلب
ثم نذهب إلى التصوير وتدفع . ثم نعود إلى نفس الموظف لكي يقوم بإثبات التوكيل في الدفتر . ثم نذهب إلى المدير لكي
يقوم بختم الطلب بختم النسر . ثم .... هوه لسه فيه ثم لا كده خلاص تاخد التوكيل وتروح . شفت لفه سهلة أزاي شفت
الدقة في العمل والنظام هوه ده الشغل المظبوط اللي ميخرش المية ...
حولني المدير إلى الأستاذة (أماني) وحول الثلاثة الآخرين حول كلاً منهم إلى موظف مختلف وبعد كتابة التوكيل والدفع
في الخزنة رجعنا للموظفين لقينا الست ( أماني ) وبجوارها موظفة منقبة وموظفة ثانية تزن نصف طن قابلة للزيادة
وقد وضعوا طعام الإفطار على المكتب وكام ربطة جرجير وكام فحل فصل وطبعا الغذاء الرسمي للشعب المصري
طبق الفول وأقراص الفلافل الملتهبة وحتة جبنة قديمة وكيس الطرشي ..... وكفاية كده أحسن الواحد عصافير بطنه بتصوصو ... دخلت وقدمت الطلب للأستاذة أماني .
- أيه يا أستاذ مش شايفنا بنتنيل بنطفح هي الدنيا طارت يا أخويه ؟
- معلش يا أستاذة أسف أصلي واخد أذن من الشغل وبعدين ............
- خلاص يا سيدي أنت حتحكي لنا قصة حياتك .
وقالت الموظفة النص طن : أستنوا بره شوية علشان الست تخلع النقاب يلا يا أخويه أنته وهوه .
خرجنا جميعاً من الحجرة علشان الست تقلع النقاب _ يا سلام منتهى الالتزام الديني _ وأثناء وقوفنا بالخارج وكل واحد
عمال يفضفض ويشتم في البلد واللي فيها . دخل على المدير رجل يرتدي بدله لامعة ونظارة شمسية من الماركات
العالمية _ مش النضارة الصيني أم خمسة جنية _ وفي ثواني معدودة أستدعى المدير أحد السعاة وأعطاه توكيل البيه
أبو بدله ودخل الساعي على الأستاذة أماني ووقعت الطلب وهيه بتاكل ودفع في الخزنة وأنهى الطلب في لمح البصر .
يا سبحان الله الناس الهاي لايف دول يا أخي ليهم طله كده وبيبان على وشهم سبحان الله وتلاقي مصلحتهم ماشيه في أي
مكان وفيه علامات مميزة كده بتبان عليهم وتلاقي ختم (v-i-p ) باين على وشهم ومنور ....
أما بقه اللي زي حالتنا برضه بيبان عليهم أزاي متعرفش . بس أنا بقه عارف وأقولك السبب .
السبب يا سيدي أنا أحنا بنتولد وعلى قفانا ختم مشفر أنته متشفهوش ولا تاخد بالك منه حته لو جبت مرايتين وحطيت واحده ورا قفاك وواحده قدامك برضه متشفش الختم رغم أنه واضح زي الشمس والموظفين زي الأستاذة أماني والناس
دول بيشوفوه بكل وضوح ومهما تحاول تداري الختم ده أو تشيله لا يمكن لازق بغره وملوش حل .
وبعد ما أتطلعنا على الباب الأستاذة أماني فتحت الباب ونادت علينا ولم نتمالك أنفسنا من الفرحة ودخل واحد مننا بسرعة _ ويا ريته مادخل _ الراجل من فرحته رجله خبطت سلك الفيشة بتاعة السخان والكنكه أتدلقت والسخان عمل
قفله في المصلحة والفيشة ولعت وأحنا واقفين في ذهول والاستاذة المنقبة فتحت حنفية الردح وفين يوجعك :
- مش تحاسب يا بني أدم .الله يخرب بيوتكوا .أنا عارفه الأشكال دي بتتحدف علينا منين .
- وقالت الأستاذة اماني : عالم بهايم عالم معندهاش دم ربنا يتوب علينا من الأشكال دي .
- وقالت الموظفة النصف طن : داخل زي الطور ربنا يقرفكوا بقرف .
ولا واحد فينا نطق بكلمة ودول هات يا ردح ..... وأنا واقف عمال أدفن رقبتي بين كتافي وألملم في نفسي علشان
أداري الختم أبن ال...........
لكن هوه مين يا حبيبي ده ختم أبن...........ملوش حل .

بمبي مسخسخ

الحركات السياسية في العالم تتخذ من الألوان شعاراً لها فنجد مثلاً حركة ( اليد السوداء ) في يوجوسلافيا وثورة
( الورد ) في جورجيا والثورة ( البرتقالية ) في أوكرانيا وثورة ( السوسن ) في قيرجيزستان وجماعة
( الألوية الحمراء ) في إيطاليا وهناك أيضاً جماعة الرافضين لسياسات بيرلسكوني والتي تتخذ اللون (البنفسجي)
رمزاً لها ومن أشهر الحركات الآن حركة ( القمصان الحمر ) في تايلاند وهذه الجماعة لا تكل ولا تمل وقد جمعوا
عينات من الدماء ووضعوها في زجاجات وسكبوها أمام منزل رئيس الوزراء فيجا جيفا ويواصلون الإضراب
والاعتصام في الشوارع ويرفضون التفاوض مع الحكومة بأي شكل .
وأحنا في مصر مش أقل من الناس دول أحنا برضه هنعمل حركة ملونة زيهم بالظبط ما أحنا في بلد ديمقراطي جداً
جداً جداً ........... وكل واحد يعبر عن رأيه زي ما هوه عاوز والحركة دي أكيد حتجيب نتيجة ويحصل التغيير
اللي كل الناس بتحلم بيه زي ما حصل في كل الدول التانيه .
وهذه الحركة هيكون اللون بتاعها هوه اللون ( البمبي المسخسخ ) ولما نطلع في مظاهرات في الشوارع كل واحد
هيشيل راية لونها بمبي وعليها فيونكة حمره ونطلع في الشوارع وفي ميدان التحرير وفي أي حته في البلد نهتف
ونعترض ونشجب ونقول كل المطالب اللي أحنا عاوزينها .
وإذا الشعب يوماً أراد الحياة لابد أن يستجيب القدر . ولا يأس مع الحياة ولا حياة مع اليأس ...يا حبيبي يا مصطفى
يا كامل يا جامد . وطبعاً لو الأمن فكر يضرب نار ويسمع كلام نواب الحكومة ولا يضرب قنابل مزيلة للعيون
طبعاً أحنا مش حنسكت أحنا معانا سلاح برضة وهنرد بقوة وعنف ..
كل واحد يشيل باقة ورد بمبي لون الحركة طبعاً ونرمي الأمن بالورد يلا بقه هيه موته ولا أتنين .. كفاية بقه يا
جدع زهقنا من الخوف والجبن وزمن السكوت خلاص معدش ينفع . أحنا لا بنخاف ولا بنكش لو حتى حنغمس
دود بمش وأحنا شعب جبابرة ولما نسكت شويه ونصهين ونطنش ونكبر ونشرب كاسات الذل من اللي يسوا واللي
ما يسواش مش معنى كده أن أحنا هفية ولا مؤاخذة .......... لا يا حبيبي أحنا رجالة وهنعيش رجالة ونموت رجالة
وهنقف وقفة رجالة ........... وسلملي على الحاج محمد أبو سويلم .

www.adpsakher.blogspot.com

أدب ساخر

عاوز تكسب فلوس كتير ..... أتفضل

الفن مرآة المجتمع وعظمة الفن أن يكون قادراً على استشراف المستقبل والتنبؤ بما سيقع من أحداث وانعكاسها على المجتمع وكثيراً من الأعمال الفنية كانت في زمانها تعتبر ضرباً من الخيال وتثير في
الناس الضحك والسخرية ثم تصبح بعد ذلك واقع ملموس . شكلك كده أتعقدت من الموضوع ومش ناوي
تكمل .... خلاص يا سيدي نخش في الموضوع.
كلنا طبعاً فاكرين مسرحية عادل أمام ( شاهد ماشفش حاجه ) وفاكرين طبعاً مشهد المحكمة مع الحاجب والراجل عينه هتطلع على قزازة الكوكاكولا وفاكرين لما الراجل شرح ظروفه لعادل أمام وأن
هوه وآمراته وحماته وسبع عيال عايشين في أوضه واحده وعادل أمام كان مستغرب جداً رغم أن ده
شيء عادي جداً جداً والمصيبه بقه أن اليومين دول كل الناس اللي زي أخينا مطالبين بتقديم اقرار
للضرائب العقارية ومعاهم كمان سكان العشش والمقابر .... معلش هيروحوا من ربنا فين _ طبعاً الناس
مش المسئولين _ فاكرين بقه لما عادل أمام قال للراجل ( أتكل على الله وأشتغل رقاصة ) والناس قعدت تضحك أزاى راجل بشنبات كده وشعره عامل زي كوز الليف ويرقص ويهز وسطه ويتشخلع
قدام الناس حاجه تموت من الضحك ..
لا يا سيدي مش حاجه تضحك ولا خيال ولا فنتازيا دي حاجه عادية جداً اليومين دول . أزاي...
أنا شفت برنامج في التليفزيون من كام يوم جايبين واد شباب عامل دوجلاس وشعره نازل على قفاه
وأسمه عمرو والمهنة بتاعة عمرو بلا فخر ( رقاص شرقي ) والمذيعه قالت لعمرو مش شايف يعني أن
المهنة دي يعني .... مهنة ..... ورد عليها عمرو : حضرتك أحنا في بلد ديمكراطي ومجتمع مفتوح
مفتوح على الأخر ومن حق كل واحد يعمل اللي هوه عاوزه .
المذيعة : بس أحنا عارفين أن فيه رقاصة وبترقص لكن مسمعناش عن رقاص قبل كده .
عمرو : حضرتك دلوقتي مفيش فرق بين ست وراجل والستات دلوقتي بيطالبوا بالعمل في الكضاء
رغم أن دي مهنة رجالي خالص والدنيا كلها واقفة على رجل علشان المطالبة بحقوق الستات يبقه
مفيش مانع أن الرجالة ترقص وتهز زي ما هيه عايزه ...
المذيعة : حناخد فاسل نشوف كليبات لعمرو وهوه بيرقص ونرجع تاني خليكو معانا...
طبعاً معاكي يا ست هنروح فين لما نشوف المصيبة السودة اللي حطت على دماغ الرجالة يا أنهار
أسود الواحد يوري وشه للناس أزاي ويعمل راجل في البيت أزاي بعد ده كله ...
أنا فاكر مره وأنا في أوله إعدادي الأستاذ حسن رشدي مدرس العربي دخل الفصل وبعد القيام والتحية
بص في وشنا واحد واحد ( نافرررررررررر نافرررررررررر) وجه عندي وراح واقف يا نهار ملوش ملامح
ولقيت عينه من ورا النضارة الكعب كباية بتطق شرار ... أنته يا ولد أطلع بره ... تعالى هنا... أنا يا
أستاذ .. أيوه أنته وقفت وانا ركبي عماله تخبط في العيال اللي جنبي ... أنته فاتح صدرك وعاملي شبيح _ وكان زرار القميص أتفك لوحده والله لا صياعه ولا حاجه خالص ..
لا يا أستاذ حضرتك أصل ..... أنا ...... الزرار ...أفتح أيدك يا حيوان ودب ...يا صايع ودب....
بزياده مسخرة وقلة أدب ودب...ودب.... عيال ناقصة تربية ودب......
معرفش بعد كده مين من العيال روحني البيت همه كانوا أربعه شايلني قصاد بعض مرابعه .....
نرجع للأخ عمرو عرضوا الكليبات الراجل صراحة عمال يهز فشر فيفي عبده ولا الحاجة دينا وفيه
كليب كان حاطط شمعدان على دماغه وشغال ميت فل والناس بتنقطه كمان ...
المذيعة : رجعنا لحضراتكو تاني اللي عايز يتسل رقم البرنامج موجود على الشاشة ونسأل عمرو أنت
بتكسب كويس من الشغلانه دي ....
رد عمرو : أنا باخد من الملهى اليلي _ وعلى فكره فيه ناس جهله بيقولوا كبارية _ باخد 3000
جنيه في الليلة وفي الأفراح باخد من 3000 إلى 4000 جنيه وممكن يكون في الليلة الواحدة أربع
خمس لأفراح ...
يا نهار زي بعضه أيه ده يا أبني يعني بالميت عمرو بياخد في الأسبوع تلاتييييييييين ألف جنيه
يعني يطلعوا كام في السنة .. أستنى يا أستاذ حسن أطلع من دماغي الله يسترك متبصليش كده من
تحت النضارة ....
أسرعت إلى التليفون وأتصلت بالبرنامج .. ألو ... أيوه يا أفندم أتفضل حضرتك على الهوا
ممكن بعد أذن حضرتك أبوس أيدك تديني تليفون الأستاذ عمرو .........

من غير سبب

طبعاً عندنا الضحك من غير سبب ॥ قلة أدب ।ليه متعرفش أحنا طلعنا لقيناها كده رغم أنك لو تأملت هذه المقولة بنظرة فلسفيةعميقة ستجد عكس ذلك تماماً وستجد الصورة مغايرة لما هو متعارف عليه । وتعالى نحسبها مع بعض أشمعنه الضحك من غيرسبب هو اللي يبقه قلة أدب _ خد عندك مثلاً لو سيادتك شفت واحد بيعيط ومقطع نفسه من العياط طبعاً حتقعد تمصص في شفايفك وتقول يا حول الله الراجل ده شكله واقع في مشكلة كبيرة ॥ ربنا يصبره والله الراجل ده صعبان عليه جداً وربما تتقدم لمواساته وتقعد تطبطب على كتفه وشويه تروح مدمع وتقعد تنهنه جنبه والراجل يفقعد يطبب عليك ويسكت فيك ومعلش يا عموربنا يصبرك ... لا يمكن حنفية عياط واتفتحت। رغم أن سيادتك متعرفش الراجل بيعيط ليه من أصله ।لكن المصيبه بقه لما تشوف واحد قاعد مع نفسه وعمال يضحك ومظغطط على الأخر । برضه هتقعد تمصمص في شفايفكوتضرب كف على كف وتقول لا حول الله الجدع ده أهبل ولا شكله مبلبع حاجه .... ومصيبه سودة على دماغ أهله لو عدى عليه حد من اخوانا بتوع الشرطة ولقاه مبسوط وعمال يضحك كده مع نفسه ...فين يوجعك ... ويجرجره على القسم ويخش الحجز ... يلا بقه يا حبيبي بتضحك وبسوط خش جوه بقه شوف الانبساط على حق ... وأكيد حينادي على بشلة ومشرط وكل الأخوة الأعداء ويوصيهم على الزبون ... وربنا ما يوريك يا حبيبي.... يا نهار ملهوش ملامح كل ده ليه علشان بيضحك من غير سبب ... وأشمعنه الضحك يا أخوانا ما هي كل حاجه حوالينا من غير سبب ومحش فاهم حاجة في أي حاجة واللي فاهم ربنايستره ينورنا ويفهمنا معاه .......خد عندك مثلاً الأسعار أرتفعت فجأة ومن غير السبب والسادة المسئولين قالوا أن الأسعار زادت علشان الأسعار العالمية زادت وأحنا أقتصادنا مرتبط بالعالم واقتصادنا مفتوووووووح فلازم نتأثر ॥ ماشي يا سيدي بعد كام شهر الأزمة العالمية هبت على الكل والأسعار بقت في الأرض ... لكن الأسعار عندنا زادت تاني ليه ياجماعه هو أقتصادنا اللي لا مؤاخذة كان مفتووووووووووووح خلاص بقه مقفوووووووووووول السادة المسئولين قالوا أن السلع القديمة كانت لسه موجوده عند التجار وبعد شهرين تلاته الأسعار هتنزل مع السلع الجديدة ..... ماشي يا سيدي نصبر كام شهر كمان يعني جت على دولوبعد شهرين تلاته أيه اللي حصل الأسعار عندنا زادت تاني ... نكمل ولا بلاش بلاش أحسن ।طيب الكلام ده كله من غير سبب يبقه ده أسمه قلة ايه...............خد عندك مثل تاني واحد من السادة المسئولين الكبار قوي قال أن المواطن اللي دخله ( جنية ونصف ) في اليوم ميبقاش فقيرشايفك بتكتم الضحكه وبتداري بقك بأيدك أوعى تعملها لأن ده ضحك من غير سبب وبعدين مصيرك يبقه زي أخونا الل خدوه عند مشرط وبشلة ... بس أنته بقه مش حتبقى مع دول يا حلو أنته حتروح حته تانيه خالص واخد بالك حته تانيه شايفيني وأنا بغمز بعيني ...حته تانيه .... طيب أنا راضي زمتك يا شيخ الكلام ده يبقه قلة أيه .................

كفايه حرام

لا أعرف لماذا يخاف الناس من التغيير رغم أن التغيير من السنن الكونية الثابتة ودوام الحال من المحال , وأنا هنا لا أقصد التغيير السياسي
كما قد يتبادر إلى ذهنك وكلمة كفاية في عنوان المقال ليس لها أي مدلول سياسي وليس لها علاقة بأي جماعات سياسية على الاطلاق فالوضع
السياسي في البلد (ميت فل) والمواصلات فاضييييييييييييييه والشقق فاضيييييييييييه والبلد كلها فاضييييييييييه وكله تمام أحسن حد دماغه تروح كده ولا كده يعني , وأنا في الأمور السياسية من أنصار (سياسة عم مدبولي ।
تقولي أيه سياسة عم مدبولي أقولك يا سيدي : الراجل بيقول أحنا مش عايزين الريس يتغير ولا السادة الوزرا يتغيروا । ليه يا عم مدبولي
أولا : لأن اللي تعرفه أحسن من اللي متعرفوش , حد عارف الريس الجديد هيكون شكله أيه وحيعمل فينا أيه ।
ثانيا : من عاشر القوم أربعين يوم بقه منهم , وأحنا مش عشرة يوم ولا أتنين دي عشرة سنيييييييييييييييييييين والعشره متهونش إلا على مين؟
وثالثا : ودي أهم حاجه علشان التالته تابته , المسئول اللي يقعد مشرفنا عشرين قول تلاتين قول أربعين سنه يبقه هوه الأصلح ليه ؟
علشان شبع وخلص لكن اللي هييجي جديد ربك ما يوريك عاوز لسه يكون نفسه ويعمل قرشين للعيال وأنت فاهم ।
فهمت يا عم مدبولي , والله كلام معقول ما أحنا شعب ميملاش عينه غير التراب وكل مشاكلنا نجيبها على الحكومة وعلى المسئولين رغم أن
أحنا السبب في كل المشاكل ونرجع نقول عاوزيين ديمقراطية وعاوزين تغيير وكفايه ومش كفايه وكلام فارغ طيب يا أخويا ما نصلح
نفسنا الأول ما أحنا السبب في كل المشاكل , خد عندك مثلاً مشكلة البوتاجاز والأنابيب من جهل الناس بيقولوا الحكومة هيه السبب لكن
أتضح أن الموضوع غير كده خالص । واحد من المسئولين الكبار قوي قال أن الناس هيه السبب ليه ؟ علشان بطلوا يستخدموا الحطب والقش
وأساليبي الطهي القديمة اللي كنا ماشيين عليها زمااااااااااااااااااااان । شفت بقه أحنا السبب يعني المطلوب مننا دلوقتي كل واحد يبني جوه الشقه
(كانون) ويشتري حمل قش على حمل حطب على كام قرص جله ويخزنهم في البيت وممكن نطور الموضوع ونشغل مخنا زي الناس
ونخلي الشباب يلم الجله من الفلاحين وشباب تاني يحول الجله إلى أقراص وشباب تالت يوزع الجله على البيوت ويكون التوزيع على
بطاقة التموين برضه علشان هتبقه ( جله مدعمه ) وبكده نحل أزمة البوتاجاز ونقضي على البطالة وشوف بقه ضربنا كام عصفور بحجر
واحد _ قصدي بقرص واحد _ وترجع تقولي الحكومة والمسئولين يا راجل ( بلا نيله ) على رأي الست ماري منيب ......

أهلاً بك عزيزي الزائر في هذه المدونة المتواضعة

هنا نقدم مقالات في الأدب الساخر وقصص قصيرة

وروابط للكتب الأدبية والروايات والشعر

ونتمنى أن تحوز هذه المدونه على اعجابكم